Помалите компании во Европа го привлекуваат вниманието на инвеститорите, помагајќи им да ги заштитат своите портфолија и од царини и од посилно евро, додека поевтините кредити и перспективата за поголемо трошење на владата ја зголемуваат довербата во економските перспективи, пишува „Reuters“.
Фокусирањето на помалите домашни компании ги прави инвеститорите помалку ранливи на даноци за прекугранична стока и помалку изложени на валутните флуктуации кога еврото зајакнува, што го прави извозот од еврозоната поскап во странство.
Индексите на мали и средни компании STOXX Europe пораснаа за 9% и 11% соодветно оваа година, надминувајќи го индексот на големи компании STOXX Europe, кој порасна само за 7%.
Претседателот на САД, Доналд Трамп, склучи неколку трговски договори со глобални партнери откако објави широки глобални царини во април, особено договорот со Јапонија.
Сепак, сè уште нема договор со Европската Унија, а рокот до 1-ви август е на повидок. Шпекулациите за царина од 15% за ЕУ се појавија во средата, но брзо беа отфрлени од Белата куќа.
„Една од предностите на компаниите (со мала капитализација) е тоа што тие се малку повеќе географски изолирани“, рече Ингмар Шефер, менаџер за портфолио во „Van Lanschot Kempen“.
„Што и да се случи со американските тарифи, локалните компании нема да бидат погодени толку многу како глобалните играчи во истата област“, додава Шефер.
Анализата на „Goldman Sachs“ покажа дека компаниите во индексот на голема капитализација STOXX генерираат околу 35% од своите приходи во Европа, во споредба со 60% за компаниите во индексите на мала и средна капитализација.
Тоа помогна да се компензира посилната валута. Еврото се зголеми за повеќе од 12 проценти во 2025-та година на околу 1,17 долари, побивајќи ги предвидувањата пред објавувањето на тарифите на 2-ри април, таканаречениот „Ден на ослободувањето“, дека можеби дури и ќе достигне паритет со доларот. Но, тоа предвидување беше оспорено од инвеститорите кои им го свртеа грбот на американските средства.
Некои аналитичари сега очекуваат еврото да достигне 1,20 долари, што може да биде пречка за поголемите компании поради нивната поголема меѓународна изложеност, но е релативно поволно за помалите компании.
„Луѓето историски ја поддржувале Европа со тоа што се определувале за компании со висока изложеност на американските или азиските потрошувачи преку луксузниот сектор“, рече Хари Иствуд, главен инвестициски директор во „Artemis Investment Management“.
„’Денот на ослободувањето’ малку го наруши глобалниот трговски ред, а компаниите со мала и средна капитализација станаа многу поинтересни, едноставно затоа што беа донекаде изолирани од него“, вели Иствуд.
Историски гледано, помалите компании имаат тенденција да тргуваат со премија во однос на поголемите компании бидејќи имаат тенденција да покажуваат повисоки стапки на раст.
Сепак, ситуацијата се смени во 2023-та и 2024-та година, кога инфлацијата во Европа се забрза и Европската централна банка (ЕЦБ) ги зголеми трошоците за позајмување, предизвикувајќи помалите компании да тргуваат со попуст во однос на поголемите компании.
Малите компании тргуваа со рекордни 11% попуст во однос на поголемите компании во март оваа година, но тоа се намалува оттогаш.
Индексот STOXX Europe на мали компании моментално се тргува со мултипликатор цена-заработка од 13,4, под нивото на индексот на големи компании од 14,3 пати, или попуст од 6,5%.
„Бевме во ситуација каде што повеќето инвеститори имаа помала доверба во резултатите на малите компании отколку на големите компании, поради што тргуваа со попуст“, рече Дејвид. Волтон, менаџер на фондови во „Marlborough“.
„Но, во текот на изминатиот месец видовме мало зголемување на довербата во изгледите за извештаите на малите компании, што го поддржува растот“, додава Волтон.
Европските компании со мала и средна капитализација бележат нето приливи во последните 10 недели, што е најдолгиот таков период од 2021-ва година, според податоците за протокот на акции на „Lipper“.
Германија, најголемата економија во еврозоната, објави масовно зголемување на трошењето, а Европската централна банка ги намали каматните стапки. Двете мерки би можеле да обезбедат многу потребен поттик за економијата на еврозоната по години слаб раст.
Германскиот индекс SDAX на мали компании скокна за речиси 20% од федералните избори во февруари, додека индексот DAX на големи компании порасна за 8,4% во истиот период.
ЕЦБ го заврши својот циклус на намалување на стапките оваа недела, но депозитната стапка е за 200 базични поени пониска отколку што беше во средината на минатата година.
„Кога ги гледаме следните 12 месеци, мислиме дека дефинитивно би можело да има ревалоризација на компаниите со мала капитализација наспроти компаниите со голема капитализација“, вели Шефер од „Van Lanschot Kempen“.
