Германскиот производител „Audi“ во последно време се соочува со тешкотии, но верува дека може да ги сврти работите и да привлече дополнителни клиенти со нови модели како што се „A5“, „A6“, „Q3“ и „Q5“.
Во исто време, компанијата подготвува нов „многу емотивен спортски автомобил“ што треба да го врати брендот „на вистинскиот пат“.
„Треба да престанеме да талкаме и да се вратиме на вистинскиот пат, и тоа да го направиме сега. Мислам дека најлошото заврши за компанијата и откако го допревме дното, сме на пат кон местото каде што нè очекува нова ера“, рече извршниот директор Гернот Долнер, цитиран од „Bild“.
Според извештаите, брендот планира да претстави концепт автомобил оваа есен што ќе се обиде да го повтори успехот на легендарниот „Audi TT“.
Автомобилот е веќе познат во компанијата како „TT Moment 2.0“ и Инголштат е убеден дека ќе има исто влијание врз пазарот како и првиот „Audi TT“, кој дебитираше пред 25 години.
Шефот на „Audi“ го опишува новиот модел како „екстремно емотивен спортски автомобил“. Ќе биде претставен како концепт на саемот IAA во Минхен во септември, а дебито на сериската верзија ќе се одржи во следните неколку години. Новиот модел ќе биде целосно електричен и ќе ја користи основата на идниот „Porsche 718 Electric“.
Во моментов нема други детали, но се очекува дека ова „Audi“ ќе го добие новиот корпоративен дизајн на брендот, технологии од следната генерација и посовремена опрема што досега не е видена во автомобилите на германскиот производител.
