Ако често чувствувате глад, дури и кратко по оброкот, и постојано посегнувате по слатки или чоколади – можеби е време да направите некои промени во начинот на исхрана.
Постојат одредени намирници кои природно го регулираат апетитот и овозможуваат чувство на ситост подолг временски период.
Еве кои пет храни можат да ви помогнат да го победите постојаниот глад:
Риба – ситост со омега-3 и стабилен шеќер во крвта
Рибата е одличен избор за сите што сакаат да се чувствуваат сити подолго. Богата е со протеини кои не предизвикуваат нагло покачување на инсулинот, а енергијата што ја обезбедува се ослободува полека. Дополнително, омега-3 масните киселини што ги содржи не само што го намалуваат холестеролот, туку и помагаат во регулацијата на инсулинот и во спречување на нападите на глад. Овие здрави масти исто така влијаат на намалување на масното ткиво, особено околу стомакот.
Чили – зачин што го поттикнува слабеењето
Лутиот чили зачин содржи капсацин – супстанција која го забрзува варењето и го стимулира согорувањето на калории. Научно е докажано дека капсацинот го намалува апетитот и го одржува нивото на шеќер во крвта стабилно. Овој зачин е идеален сојузник во борбата против гладот и во топењето на масните наслаги.
Јаболка – влакна кои го регулираат апетитот
Јаболките се нискокалорични, но богати со вода и растителни влакна, особено нерастворливи влакна кои придонесуваат за стабилизирање на шеќерот во крвта. За најдобар ефект, јадете јаболка бавно и најмалку еден час пред оброк – така ќе внесете помалку храна подоцна, бидејќи ќе се чувствувате посити.
Овесни снегулки – природна регулација на гладот
Овесот е уште една намирница која може значително да ви помогне да го намалите апетитот. Бета-глуканот што се наоѓа во овесот го стимулира лачењето на хормони што го контролираат апетитот. Освен што ве заситува, овесот го зголемува имунитетот, го намалува холестеролот и помага во контролата на дијабетесот.
Компир – незаслужено потценет во менито за слабеење
Иако често се смета дека компирот е непријател на линијата, тоа не е точно ако се подготвува правилно. Варениот или печениот компир содржи сложени јаглехидрати кои не го зголемуваат нагло нивото на инсулин. Само 100 грама варен компир има двапати помалку калории од истата количина варен ориз или тестенини. Важно е само да се избегнува пржење – најздраво е да се консумира варен или печен.
