„Deutsche Bank“ планира да го намали бројот на членови на Управниот одбор од 10 на 9 и да укине работни места во областа на инфраструктурата и приватното банкарство.
Целта е на тој начин да се заштедат трошоци, изјави извор близок до банката, цитиран од „Reuters“.
Најголемата германска банка, која треба да ги објави резултатите за првиот квартал на 27-ми април, одби да ги коментира плановите.
Според инсајдерот, мерките за намалување на трошоците не се поврзани и не влијаат на плановите за смена на заменик-извршниот директор Карл фон Рор, за кој се смета дека нема да ја задржи својата позиција како член на одборот.
Во февруари, извршниот директор на „Deutsche Bank“, Кристијан Севинг, рече дека не може да ја исклучи можноста за намалување на работните места.
Банката ја заврши фазата на трансформација на крајот на 2022-ра година со подобрен однос трошоци/приходи, но во споредба со другите европски банки, нивоата на приходи останаа под оние на трошоците.
„Deutsche Bank“ претрпе реструктуирање од повеќе милијарди евра во последните години за да ги намали трошоците и да ја подобри профитабилноста.
Во 2022-ра година, кредиторот забележа годишен нето профит од 5 милијарди евра (5,4 милијарди долари), што е за 159% повеќе од претходната година.
Нејзиниот коефициент „CET1“ – мерка за солвентноста на банката – изнесуваше 13,4% на крајот на 2022-ра година, додека стапката на покривање на ликвидноста беше 142%, а нејзиниот нето стабилен коефициент на финансирање беше 119%.
На почетокот на месецот стана јасно дека, поради обидите на регулаторите во Германија да ја зајакнат довербата во банкарскиот сектор во 2022-ра година, поплаките на потрошувачите до банките и другите финансиски компании во земјата се зголемени.
Како што „BaFin“, германското финансиско набљудување, ги засили своите мерки за заштита на потрошувачите по колапсот на компанијата за плаќања „Wirecard“, минатата година прими 15.000 поплаки од потрошувачите за нивните банки и други даватели на финансиски услуги. Во 2021-ва година, тие беа 12.500.
Според официјални лица, банкари и организации на потрошувачи, поплаките главно вклучуваат долго време на обработка на документите за затворање сметки, промени во условите и намалување на мрежите на филијали.
