Најдобриот светски тенисер Новак Ѓоковиќ го загуби случајот пред Федералниот суд на Австралија, а одлуката на тричлениот совет беше едногласна, објави во неделата врховниот судија Џејмс Алсоп нешто пред осум часот по средноевропско време.
Српскиот играч ќе биде депортиран од земјата. Ова го спречи да ја одбрани титулата на Австралија опен, првиот Грен слем турнир во сезоната.
Дополнително, се наведува дека треба да плати и судски трошоци и оштета во износ од 500.000 долари. Ќе добие и тригодишна забрана за влез во Австралија, но постои можност за тоа да добие и ослободување.
Писмените причини за одлуката на судијата ќе бидат објавени во наредните денови.
Ѓоковиќ остана без шанса да се бори за десеттиот трофеј на Австралија опен, и вкупно 21. Грен слем, со што сам ќе се најде на врвот на вечната листа. Сега шанса за тоа има шпанецот Рафаел Надал.
Отвореното првенство на Австралија започнува на 17 јануари.
Претходно вечерва, нешто по 5 часот по средноевропско време, заврши рочиштето пред Федералниот суд на Австралија за случајот Новак Ѓоковиќ против министерот за имиграција Алекс Хок. Судскиот совет ги слушна аргументите на адвокатот на најдобриот тенисер во светот и министерот за имиграција и најави дека конечната одлука ќе ја донесе во текот на денот или дури во понеделник.
Судењето пред Федералниот суд на Австралија го водеше врховниот судија Џејмс Алсоп, а во судискиот совет беа и Ентони Бесанко и Дејвид О’Калаган.
Адвокатскиот тим на Ѓоковиќ, предводен од Николас Вуд, прв ги изнесе своите аргументи, поради што смета дека треба да му се дозволи на српскиот играч да остане во Австралија. Беше посочено дека нема докази кои ги поткрепуваат тврдењата дека присуството на првиот тенисер во светот поттикнува „антивакцинирачки чувства“, и дека конечното укинување на визата всушност ќе има такво влијание.
Адвокатот изјави дека Ѓоковиќ од почетокот на пандемијата играл многу тениски турнири и по правило имал голем успех на нив и дека не е забележан ниту еден случај на „лобирање против вакцинација“ во врска со тие тениски натпревари.
Адвокатскиот тим на првиот светски тенисер побара, доколку жалбата биде прифатена, Ѓоковиќ веднаш да биде ослободен.
Правниот застапник на владата Стивен Лојд потсети на фактот дека првиот рекет во светот се уште не е вакциниран. Тој исто така изјави дека Ѓоковиќ претходно ги игнорирал мерките за заштита од ширење на корона вирусот. Тој посочи дека министерот Хок бил свесен за последиците што можело да ги предизвика укинувањето на визата на Ѓоковиќ, во секоја смисла, дури и поттикнување на „антиваксерско сентимент“. Лојд истакна дека, со право или не, Ѓоковиќ во Австралија го доживуваат како некој што е против вакцинацијата и станал „икона на антиваксерите“.
По сведочењето на двете страни, судиите се повлекоа за да ја разгледаат ситуацијата и да донесат конечна одлука. Најавено е дека ќе биде усвоена во текот на денот или дури во понеделник.
Доколку жалбата на Ѓоковиќ биде уважена, на српскиот тенисер ќе му биде дозволено да остане во Австралија и да игра на Грен слем турнирот во Мелбурн. Доколку се одбие, ќе биде депортиран и потенцијална забрана за влез во земјата во следните три години.
Потсетуваме, министерот Хок одлучи во петокот попладне, според локално време, повторно да му ја укине визата на Ѓоковиќ, нагласувајќи дека тој постапува во интерес на јавноста, со оглед дека присуството на најдобриот тенисер во светот поттикнува „антиваксерство“.
Претходно, визата на српскиот тенисер му беше укината по пристигнувањето во Мелбурн, бидејќи тој наводно не доставил доволно докази за медицинско ослободување од задолжителната вакцинација. Судијата Ентони Кели ја уважи жалбата на првиот светски рекет, а во понеделникот нареди да се поништи првичната одлука за поништување на визата.
