Приходите на „ByteDance“, компанијата што е сопственик на „TikTok“, се зголемија повеќе од двојно во 2020-та година, тврди извор запознат со ова прашање, пишува „CNBC“.
Приходите од минатата година достигнаа 34,3 милијарди долари, што е за 111% повеќе од претходната година, им рекоа од раководството на вработените за време на состанокот. Бруто профитот скокна за 93 проценти на 19 милијарди долари, според извор кој присуствувал на состанокот.
„ByteDance“ достигна 1,9 милијарди месечни активни корисници до крајот на 2020-та година на сите свои платформи, кои ја вклучуваат особено популарната апликација за кратки видео содржини „TikTok“, нејзината кинеска верзија „Douyin“ и агрегаторот за вести „Toutiao“.
Брзиот раст ја потенцира возбудата околу „ByteDance“ и зошто нејзината проценка скокна на над 100 милијарди долари.
Претходно оваа година, компанијата го ангажираше поранешниот извршен директор на „Xiaomi“, Шо Цу да биде нејзин нов главен финансиски директор, сугерирајќи дека „ByteDance“ можеби се подготвува за првична јавна понуда.
Оперативната загуба на „ByteDance“ за 2020-та година достигна 2,1 милијарда долари, наспроти оперативната добивка од 684 милиони долари за претходната година, рече изворот, кој сакаше да остане анонимен. Загубата главно се должи на акционерски надомест на акционерите, додаде тој.
Кинеската интернет-компанија успеа да постигне меѓународен успех со „TikTok“. Рекламирањето е клучен дел од приходите на „ByteDance“ кога станува збор за неговите платформи, но гигантот започна да се фокусира на нови области како што се игри и се соочува со некои од најголемите кинески и други технолошки играчи како што е „Tencent“.
Сепак, годината не беше лесна за „ByteDance“.
Во август компанијата беше прогласена за закана за националната безбедност од страна на администрацијата на поранешниот американски претседател Доналд Трамп. Имаше дури и сценарио за продажба на американскиот бизнис на „TikTok“ на локална компанија.
Во Кина, „ByteDance“ се најде под притисок на регулаторната акција од поголеми размери против технолошкиот сектор. „Douyin“, кинеската верзија на „TikTok“, заедно со уште 104 други апликации, беше запрена од кинеската администрација за сајбер-безбедност за наводно собирање лични податоци, а властите побараа од предметните служби да ги решат нивните проблеми.
Покрај тоа, „ByteDance“ претрпе големи промени во управувањето во последната година. Неговиот ко-основач, Џанг Имин, ќе се повлече од функцијата извршен директор до крајот на оваа година и ќе се фокусира на клучна стратешка улога. Другиот коосновач, Лиан Рубо, која сега е на чело на човечките ресурси, ќе ја преземе функцијата извршен директор.
