Комитетот за медицински производи за хумана употреба (CHMP) предложи одобрување на супкутаната формулација на Herceptin за ХЕР2 позитивен рак на дојка во Европската Унија.
Новиот начин на давање одзема две до пет минути, во споредба со 30 до 90 минути кои се потребни сега со моментално одобрената интравенска администрација, со што потенцијално се штедат и ресурсите во здравството и времето на пациентите, стои во соопштението од Рош.
Herceptin® е лек од портфолиото за персонализирана медицина кој се употребува кај повеќе од 80.000 пациенти со ХЕР2 позитивен рак на дојка во Европа секоја година Од првото одобрување на Herceptin во 1998 година, овој лек со целно делување е употребен кај повеќе од 1.3 милиони пациенти ширум светот.
– Во последните 14 години, Herceptin направи револуција во лекувањето на ХЕР2 позитивниот рак на дојка. Денес, преку 80.000 пациенти во Европа се на терапија со Herceptin секоја година, вели д-р Хал Барон, главен медицински директор и шеф на одделот за развој на производи.
Според него одобрувањето во ЕУ на оваа супкутана формулација на Herceptin ќе овозможи поудобна можност за пациентите што потенцијално заштедува време и средства во здравството.
Ракот на дојка е најчестиот карцином помеѓужените насекаде во светот. Секоја година околу 1.4 милиони нови случаи на рак на дојка се дијагностицираат ширум светот, а повеќе од 450.000 жени ќе починат од оваа болест годишно.
Кај ХЕР2 позитивниот рак на дојка, на површината на туморските клетки се присутни зголемени количества на хуманиот епидермален фактор на раст – рецептор 2 (ХЕР2).
Ова е познато како “ХЕР2 позитивност” и се забележува кај 15-20 отсто од жените со рак на дојка. ХЕР2 позитивниот рак всушност претставува особено агресивна форма на рак на дојкa, стои во соопштението.
