Раководството на Реал Мадрид утринава во канцелариите на Професионалната фудбалска лига (LFP) ја депонира клаузулата за откуп на халфот на Реал Сосиедад, Асиер Илјараменди.
„Кралевите“ ги платија предвидените 30 милиони евра и се очекува во најскоро време официјално прогласување на трансферот.
Според медиумите во Шпанија раководството на Реал ќе плати меѓу 36 и 38 милиони евра за целиот трансфер, сума во која ќе бидат пресметани и даноците.
Утринава баскискиот играч не се појави во тренинг-базата на Реал Сосиедад. Се очекува тој да потпише договор за пет години со Реал Мадрид и ќе зема по околу 2.5 милиони евра по сезона.
Денес фудбалерот ќе се појави на прес-конференција во Сан Себастијан на која ќе се збогува со „бело-сините“. Во следните неколку дена се очекува Илјараменди да ги мине задолжителните лекарски прегледи во Мадрид, по што и официјално ќе биде претставен како нов играч на „кралевите“.
