Македонија по вторпат како малцинска копродукција учествуваше на најпрестижниот филмски фестивал во светот.
Преку „Сестри и брат Митевски продукција“ Македонија учествува во најновиот филм на генијалниот Нури Билге Џејлан – „Дивата круша“, кој беше во главната натпреварувачка програма и имаше извонреден прием од публиката и критиката.
„Дивата круша“ на последниот натпреварувачки ден на Канскиот филмски фестивал ја имаше својата премиера на 18 мај. Екипата уште пред да почне проекцијата беше дочекана со 15-минутни овации во огромната сала „Лумиер“ во Фестивалската палата во Кан. Салата, која сместува 2 300 гледачи, се преплави од емоции по тричасовниот најнов филм на Нури Билге Џејлан и заглушувачкиот аплауз од многубројниот аудиториум беше импресивен израз на одобрување и воодушевување од виденото. Пред публиката беше претставена целата екипа на филмот и најголемиот поздрав секако му беше упатен на Џејлан, кој очигледно е голем миленик на кнската публика. Во исто време во уште две сали имаше специјални проекции за новинари.
Следниот ден, на 19 мај, филмот со голем интерес беше проследен на фестивалската прес-конференција. За време на фестивалот Македонската филмска агенција беше вклучена во промоцијата на филмот и многумина филмски префесионалци, некои и со искрено завидување честитаа за нашето учество во овој врвен културен проект.
„Дивата круша“ доби неверојатно позитивни критики во најпрестижните светски медиуми, а строгите филмски критичари го оценија со најголем број бодови од сите филмови во официјалната конкуренција.
