Трикратниот освојувач на Вимблдон, најпрестижниот турнир во светот на тенисот, Новак Ѓоковиќ (30), изјавил дека би можел да земе подолга пауза, откако поради повреда му го предаде четвртфиналниот меч на Чехот Томаш Бердих.
„Не е во прашање рамото, како што се пишува, туку лактото кој ме мачи речиси 18 месеци. Се обидов да бидам максимално подготвен за игра, пред мечот два и пол часа бев на третман. Не помогна ништо. Половина час играв со неподносливи болки“, рекол Ѓоковиќ најавувајќи консултација со лекарите за долгорочно да го реши проблемот со повредата.
„Тоа што играв ден за ден не ми помогна, но тоа е ситуација која морам да ја прифатам. На секој спортист му е тешко кога мора да го предаде мечот, особено кога игра добро, а јас тука играв најдобро во последните 10 месеци. Јасно е дека ќе морам да го менувам распоредот на турнирите, а сеуште не знам дали ќе мора да одам на операција. Долго време не сум почувствувал ваква болка. Размислувам за подолга пауза“, рекол српскиот тенисер, кој од понеделник ќе биде третопласиран на АТП листата.
