ТТК Банка АД Скопје во периодот од 1.1.2016 до 30.9.2016 година дејствуваше во насока на остварување на своите приоритетни цели и задачи дефинирани во Деловната политика и Финансискиот план на Банката за 2016 година, при што во текот на периодот го прилагодуваше своето работење на тековните економски и пазарни услови на стопанисување.
Банкатa, од своето работење во периодот 1.1. – 30.9.2016 година, оствари позитивен финансиски резултат во износ од 17,7 милиони денари, којшто е повисок во однос на финансискиот резултат остварен во истиот период минатата година во износ од 8,1 милиони денари.
Остварената добивка на Банката пред исправка на вредност изнесува 131,4 милиони денари и е за 26,8% повисока споредено со минатата година. Во анализираниот период, Банката успеа да генерира оперативни приходи кои се повисоки за 4,5%, како и ефикасно да управува со оперативните расходи и да оствари нивно намалување за 5,0%, што резултира со подобрување на оперативната ефикасност во работењето на Банката.
Нето-приходите од камати на 30.9.2016 година изнесуваат 196,0 милиони денари и бележат мала надолна промена од 2,4%, споредено со истиот период минатата година. Внимателниот пристап на Банката при кредитирање на секторот нефинансиски друштва влијае реализацијата на планираното ниво на нето-приходи од камати да изнесува 93,3%.
Нето-приходите од провизии и надоместоци за услуги во тековниот период изнесуваат 106,3 милиони денари и во однос на истиот период од минатата година се пониски за 8,5%. Намалувањето во најголем дел потекнува од сегментот кредитирање на стопанство. Планираните нето-приходи од провизии се остварени со 89,0%.
Нето-приходите од курсни разлики изнесуваат 6,8 милиони денари и во однос на минатата година бележат намалување за 1,1 милиони денари или 14,2%. Остварувањето на планот изнесува 80,6%.
Останатите приходи од работењето на Банката изнесуваат 54,2 милиони денари и во однос на минатата година се повисоки за 30,5 милиони денари или 128,3% како резултат пред сѐ на реализираните капитални добивки од продажба на средства. Степенот на исполнување на планот е 148,8%.
Вкупните оперативни трошоци во анализираниот период изнесуваат 232,5 милиони денари и споредено со истиот период минатата година се пониски за 5,0%, при што заштеда се забележува кај материјалните и административни трошоци, како и кај трошоците за амортизација. Степенот на исполнување на планот е 93,3%.
Во согласност со Одлуката за сметководствениот и регулаторниот третман на средствата преземени врз основа на ненаплатени побарувања, во периодот јануари – септември 2016 година евидентирана е загуба поради оштетување на нефинансиските средства на нето-основа во износ од 37,6 милиони денари, што е за 29,9% пониско оштетување во однос на минатата година. Подобрувањето на споменатата позиција се должи на континуирани напори за продажба на преземените средства.
Исправката на вредноста на финансиските средства на нето-основа во анализираниот период изнесува 76,0 милиони денари и издвоените исправки на вредност соодвествуваат со обемот, структурата и со квалитетот на пласманите на Банката.
Комплетниот финансиски извештај можете да го погледнете тука.
