Европската централна банка ќе биде принудена на проширување на програмата за монетарни поттикнувања, доколку владите не делуваат според планот за зајакнување на растот на нивните економии. Тоа го изјави членот на ЕЦБ, Беноа Кер.
„Доколку не се случат многу нешта кога станува збор за структурните реформи, доколку не се случат многу нешта во фискалната политика, тогаш ЕЦБ ќе мора да направи нешто повеќе“, изјави Кер на една панел дискусија во Женева, пренесува Блумберг.
Управниот совет на ЕЦБ ќе се состане на 8-ми септември, откако членовите на таа институција на претходниот јулски собир одлучи да се воздржи од нови мерки, само неколку недели по изненадувачката одлука на Велика Британија да отстапи од ЕУ.
Со оглед на тоа дека до почетокот на септември ќе испливаат нови економски последици од Брегзит, одделни набљудувачи веруваат дека претседателот на ЕЦБ Марио Драги ќе најави дополнителни поттикнувачки мерки.
Драги во јули изјави дека ЕЦБ е „подготвена и способна“ да интервенира, доколку за тоа има потреба.
Клучните каматни стапки во еврозоната се во негативната зона од 2014 година, иако ЕЦБ воведе повеќе милијарди евра вредни поттикнувања кои вклучуваат купување на владините и корпоративните обврзници секој месец во износ од 80 милијарди евра и евтини кредити за банките во настојување да се вбризга дополнителна ликвидност во финансискиот систем.
