Поранешниот селектор на ракометната репрезентација на Хрватска Лино Червар (65) доби големо признание од Европската ракометна федерација (ЕХФ) примајќи ја во Краков наградата за најголеми тренерски достигнувања во кариерата.
Червар е прв кој го добива ова признание, а наградата му ја врачи претседателот на ЕХФ, Жан Брио.
„Јас не сум професор по ракомет, туку ракометен тренер со визија и идеи. Моите резултати се производ на константно учење и анализи. Ова е прекрасно признание за мојата кариера која е долга 40 години“, рекол Червар на свеченоста во Краков.
Червар е еден од најтрофејните тренери во историјата на овој спорт, под негово водство Хрватска го освои светското злато во Португалија (2003), олимпиското во Атина(2004), две светски сребра (2005, 2009) и две европски сребра (2008, 2010).
Како клупски тренер, Червар со Загреб освоил осум титули и седум купови во Хрватска, односно четири титули и четири купа со Металург во Македонија.
