„Anheuser-Busch InBev“ планира да продаде еден од најпопуларните брендови на пиво, сопственост на „SAB Miller“. Ова се случува во услови на обидите на најголемата пиварница во светот да се справи со загриженоста на европските регулатори кои произлегуваат од фактот дека таа го купи својот најголем конкурент.
„AB InBev“ планира да ги продаде „Grolsch“ и „Peroni“ – и двете во сопственост на „SABMiller“ и со продажба низ целиот свет, тврди извор кој е запознаен со ова прашање. Се уште не е склучена зделка за нив и продажба не е сигурна, додава тој.
Правата на брендовите „Peroni“ и „Grolsch“ во САД ќе останат во рацете на „MillerCoors“. Како дел од договорот за стекнување на „SABMiller“, „AB InBev“ се согласи да продаде делови на „SABMiller“ (58%) во заедничко вложување „MillerCoors“ на нејзиниот партнер „Molson Coors Brewing“.
Претходно овој месец „AB InBev“ го купи „SABMiller“ за близу 108 милијарди долари, договор со кој ќе се создаде најголемата компанија за производство на пиво со 30% удел на глобалниот пазар на пиво.
Аналитичарот на „Sanford C. Bernstein“ Тревор Стирлинг тврди дека во Западна Европа „AB InBev“ и „SABMiller“ имаат голем вкупен удел на пазарот во Италија и Холандија, каде тој изнесува соодветно на 30% и 27%. Компаниите имаат комбиниран удел од над 20% и во Велика Британија и Унгарија. Европските регулатори неофицијално ја користат границата од 30% удел на пазарот како показател за кога се размислува дали одредена трансакција или компанија може значително да влијае на пазарот.
„Peroni“ и „Grolsch“ се два од четирите светски брендови на „SABMiller“. Другите се „Miller Genuine Draft“ и „Pilsner Urquell“.
