28 март, 2024
ПочетнаКУЛТУРАНаградуваниот бестселер „Чик“ преведен на македонски

Наградуваниот бестселер „Чик“ преведен на македонски

cik5558

Издавачката куќа „Антолог“ од Скопје со големо задоволство го најавува објавувањето на романот „Чик“ од предвреме починатиот Волфганг Херндорф.

Романот е добитник на високи книжевни награди како Наградата за најдобра книга за млади во Германија, потоа наградите „Клеменс-Бретано“ и „Ханс-Фалада“. Само во Германија книгата се има продадено во повеќе од милион примероци. Во моментов се снима истиоимениот филм во режија на познатиот германско-турски режисер Фатих Акин. Преводот на македонски е на Душанка Каевска.

„Чик“ ја раскажува приказната за пријателството помеѓу двајца средношколци. Мике Клингенберг нема пријатели. Тој верува дека тоа е така затоа што е досаден, што му се увртува во глава кога не добива покана за забавата на годината што ја организира најпопуларната девојка во училиштето. Со оглед на тоа дека мајка му е алкохоличарка што е на рехабилитација, а татко му е на службено патување, на Мике сите денови му се исти. Сè дури едно ново, малку чудно дете со потекло од Русија, не се појави во неговиот дом. Бидејќи немаат што да прават, освен да се додеваат и да играат видеоигри, Мике и Чик решаваат да одат на патување без дестинација, географска карта или без мобилни телефони. Ќе го погрешат патот, ќе извршат неколку кривични дела и ќе се запознаат со ексцентрични луѓе. Но едно нешто е сигурно: доколку воопшто се вратат, ниеден од нив нема да биде досаден повеќе. Романот „Чик“ (2010) цела година котирал на листата на бестселери во Германија. Книгата е објавена со поддршка на програмата „Креативна Европа“ на Европската Унија.

Волфганг Херндорф (1965-2013) е германски писател. Студирал ликовна академија. Работел како илустратор. Бил активен блогер и член на националниот фудбалски тим на писатели „Автонама“.

Душанка Каевска е професионален преведувач. Дипломирала на Филолошкиот факултет „Блаже Конески“ во Скопје, а магистрирала англиска и германска литература во Ахен, Германија. Ги преведувала на македонски Франц Кафка, Херман Брох, Карл Густав Јунг, Тимур Вермеш и други. Живее и работи во Германија.

НАЈНОВИ ВЕСТИ

ХОРОСКОП