Нафтениот гигант „BP“ ќе плати над 20 милијарди долари казни поради нафтата која се истури во Мексиканскиот Залив пред пет години, објави „Ројтерс“.
Така ќе бидат покриени речиси сите побарувања и ќе биде постигнат најголемот договор што Владата на САД го има постигнато со една компанија. Трансакцијата ќе биде конечно финализирана по одобрувањето на окружниот суд во Луизијана.
Оваа сума е поголема од наведените 18,7 милијарди долари во јули оваа година. „BBC“ забележува дека во 20-те милијарди долари влегуваат некои плаќања кои „BP“ веќе ги има направено.
Парите ќе бидат искористени од федералната влада на САД и од државните власти во погодените области, за да се покријат штетите за животната средина и за економијата. Казните ќе бидат исплатени во фази во текот на 18 години.
„Историскиот договор е стабилен и соодветен одговор на најголемата катастрофа за животната средина во историјата на САД“, рече министерот за правда Лорета Линч во понеделникот.
20-те милијарди долари се дополнителни кон другите 43,8 милијарди долари, кои „BP“ ќе ги плати за кривични и граѓански санкции и за чистење. Компанијата вели дека вкупниот износ што ќе плати за штетата е 53,8 милијарди долари пред оданочување.
По објавувањето на договорот акциите на „BP“ на њујоршката берза поскапеа за околу 3% до 33,45 долари за готово, откако инвеститорите го поздравија договорот.
При инцидентот на платформата „Deepwater Horizon“ на 20-ти април 2010-та година загинаа 11 работници, а над 3 милиони барели нафта истекоа во Мексиканскиот залив. Катастрофата сериозно му наштети на рибарството и доведе до промени во правилата за безбедност и активностите во итни ситуации.
