Расте бројот на македонски компании кои активно соработуваат со странските директни инвеститори. Во моментов, повеќе од 500 домашни компании соработуваат со странските инвеститори.
Експертите велат- користа е двострана. За домашните компании тоа ќе значи повеќе работа, трансфер на знаења и нови технологии, нови стандарди, како и зголемена конкурентност и секако можност за извоз на странски пазари. Странските компании добиваат пониски трошоци за набавка и побрзо време на испорака. Резултатот е раст на економијата и креирање на работни места. Засега, домашните компании од соработката со странските инкасирале околу 30 милиони евра.
„Соработката меѓу странските инвеститори и македонските компании е на доста добро ниво, се надеваме дека истата ќе продолжи и во периодот кој што следи, бидејќи бројот на странските комапнии, и според најавите на владата, секој ден се повеќе и повеќе се зголемува. Домашните компании тука го гледаат оној момент на додадена вредност кој се има со влегувањето на странските компании, тоа е онаа меѓусебна соработка која би произлегла меѓу странскиот инвеститор и домашните компании“, вели претседателката на Сојузот на стопански комори, Данела Арсовска.
Соработката, според познавачите на пазарот, најчесто е во областа на услужните дејности. Странците ги користат услугите, сервисот на домашните компании. Во периодот што следи прогнозите се дека соработката ќе се унапреди, и тоа во поголем дел од секторите во Македонија.
Кои се придобивките?
-Странските компании произведуваат производи со повисока технолошка вредност и производи кои што не се произведувале во нашата земја
-Странските компании имаат креирано преку 13.500 работни места
-30 милиони евра заработиле домашните компании од соработката со странските
Домашните компании низ текот на годините покажале дека навистина се квалитетни, а исто така се многу конкурентни во своето работење.
„Треба да се воспостави иницијалниот линк во однос на тоа што се им е потребно на домашните инвеститори, дали суровина, дали било која друга услуга или производ која ним им е потребна во работата и како македонските компании би одговориле на истото. Клучот е во квалитетот и конкурентноста, а македонските компании во секој случај тоа го имаат“, нагласува Арсовска.
Користа од доаѓањето на странските инвеститори е повеќестрана, а македонските компании со нив ја билдаат конкурентноста. Експертите велат- оние кои воспоставиле добра соработка, да ја користат како добра референца за понатамошен раст и развој.
