Функцијата за преведување во реално време, која „Skype“ ја имплементираше во својот сервис, започнува да пристигнува до сите корисници на „Windows“.
Десктоп верзијата на „Skype“ за оперативните системи „Windows 7“, „Windows 8“ и „Windows 10“ сега е ажурирана и го вклучува „Skype Translator“. Функцијата, која првично е лансирана како самостална апликација, моментално преведува англиски, француски, германски, шпански, италијански и мандарински јазик. Во следниот период може да очекуваме уште 50 јазици во „Skype Translator“.
„Долго време се сонуваше за тоа „Skype“ да ги пробие јазичните бариери и сите луѓе ширум светот да се доближат едни со други… Истражувачите, инженерите и многу други во „Microsoft“ многу вредно работеа со цел овој сон да го остварат и се радуваме на тоа оваа технологија да ја донесеме на многу повеќе уреди“, стои во соопштението на „Skype“ тимот.
Ажурирањето, кое го вклучува „Skype Translator“, на корисниците ќе им пристигне во следните неколку недели. Сега кога „Skype Translator“ ќе биде имплементиран, корисниците ќе го употребат копчето за преведување во рамките на своите разговори.
