Во организација на Македонија 2025, од 18-ти до 20-ти ноември во Скопје ќе се одржи Македонскиот економски самит, при што фокусот ќе биде ставен на тоа како да се поврзе Македонија со поширокиот регион, имајќи ги предвид глобалните движења и нивните влијанија на економиите во развој.
Самитот претставува платформа за воспоставување комуникација помеѓу македонската деловна заедница и гостите од странство, со цел да се трасира патот на развојот на домашната економија.
Самитот е наменет за сите компании, организации и поединци кои се засегнати со темата одржлив развој на економијата на Македонија, но и воспоставување деловни односи со меѓународни партнери.
Дел од говорниците на Самитот се Хери Кремер, Професор по стратегии на Школата за менаџмент Келог од САД и автор на бестселери за лидерство засновано на вредности; Џејмс Логан Џонс, поранешен советник за безбедност на Претседателот на САД, Гуру Банавар, Извршен директор за технологии на IBM, претставници на Одборот на директори на Македонија 2025 и светски реномирани економисти и менаџери.
Во изминатиот период, Македонија 2025 успешно организираше два самити во Охрид, како и два бизнис форуми во Торонто и Париз.
Овие настани резултираа со повеќе од 30 работни сесии на кои учествуваа 100 говорници од Македонија и од 40 други земји низ светот, кои ги проследија повеќе од 900 гости. Од оваа интеракција произлегоа 200 билатерални средби помеѓу компаниите.
