„SsangYong“ ја прошири палетата на мотори на компактниот кросовер „Tivoli“ со нов 1,6-литарски дизел турбо мотор. Од компанијата откриваат дека новиот агрегат одговара целосно на еколошките барања „Euro-6“.
Моќноста на новиот агрегат е 115 КС, а максималниот вртежен момент достигнува 300 Нм. Моторот може да работи во комбинација со 6-брзински мануелен менувач, како и со автоматски менувач со ист број на брзини.
Новиот „Tivoli“ е помал од познатиот модел на марката – „Actyon“, а припаѓа во „B“ сегментот на кросовери. Од компанијата-производител се категорични дека багажникот на нивниот модел е поголем од оној на повеќето конкуренти – 423 литри.
Досега моделот беше достапен само со бензински мотор со зафатнина од 1,6 литри, кој развиваше 128 КС и 160 Nm вртежен момент. Кросоверот се нуди во две верзии, кои се со различна задна суспензија.
Кросоверот „Tivoli“ е првиот заеднички модел на „SsangYong“ и индиската „Mahindra & Mahindra“, а неговото создавање траело 42 месеци и чини 280 милиони евра. Претстои на пазарот да се појави и поголема модификација која ќе располага со 7 места.
