Ракометниот шампион на Македонија, Вардар, на прес конференција, ги престави петмината нови играчи кои во преодниот рок пристигнаа во „Јане Сандански“.
Во наредните сезони ‘црвено-црниот’ дрес ќе го носат Дејан Манасков, Лука Циндриќ, Мијајло Марсениќ, Хорхе Македа и Александар Деревент.
Новите засилувања дополнително ќе го кренат квалитетот на тимот, додека амбициите остануваат исти, освојување на двојната круна во домашното првенство и пласман на завршните турнири во Лигата на шампионите и СЕХА лигата.
„Среќен сум што дојдов тука, бидејќи имам шанса да играм во ЛШ. Сакам да играм на Ф4 со овој тим. Се надевам дека тимот е добар и се надевам дека ќе успееме да ги оствариме плановите“, рече искусниот шански репрезентативец Македа.
Покрај Шпанецот најзвучно име меѓу новајлиите во Вардар е македонскиот репрезентативец Дејан Манасков.
„Драго ми е дека по кратка авантура во Германија се враќам во Македонија. Драго ми е што ќе играм во Вардар во следните три години. Ми беше претставен проектот со кој Вардар ги покажа амбициите, и мислам дека годинава треба да одиме чекор понапред, да имаме и спортска среќа и да ги оствариме сите зацртани цели на клубот“, рече Манасков.
Вардаровите ракометари пред четири дена стартуваа со подготвките, а како што информира директорот на клубот Давор Стојановски екипата до недела ќе биде во Скопје, а од понеделник се сели во Крањска Гора, Словенија каде ќе остане до 13-ти август.
Потоа Врадар ќе оди во Кањижа, Србија каде ќе учествува на меѓународен турнир, а ‘црвено црната’ експедиција ќе се врати во Скопје на 17-ти август.
Во периодот од 24-ти до 27-ми август Вардар ќе организира турнир за кој во клубот се надеваат дека ќе стане традиционален.