Грчкиот премиер Алексис Ципрас очекува да постигне нов договор за помош од кредиторите во рок од 48 часа по референдумот во недела.
Тој соопшти дека проблемот којшто го имаат граѓаните со затворените банки нема долго да трае.
Ципрас за TV ANT1 изјави дека сцените во Грција, како што се редиците пред банките и пензионерите кои со часови чекаат на пензиите се непријатни и за тоа ги обвини грчките партнери од еврозоната коишто ја принудиле Европската централна банка да ги замрзне финансисрањето за банките кое е од витална важност.
Министерот за државна управа на Грција и близок соработник на Ципрас, Никос Папас претходно изјави дека грчките банки ќе бидат отворени кога официјална Атина ќе постигне договор со меѓународните кредитори.
„Тоа, се надеваме дека ќе се случи набрзо по референдумот закажан во недела“ изјави Папас.
Ципрас ги повика Грците на референдумот во недела да гласаат против договорот за меѓународна помош, отфрлајќи ги предупредувањата дека со мнозинското „не“ Грција ќе излезе од еврозоната.