Сообраќајот на сите државни патишта се одвива без забрани, по наместа влажни коловози. Интензитетот на сообраќај на патните правци надвор од градските средини е зголемен. На граничните премини нема подолги задржувања за влез и за излез од државата.
Од среда започна времениот режим на сообраќај во летниот период од 01.07 до 01.09 на магистрален пат А2 делница: Скопје – Охрид – Скопје, со кој се забранува движење на тешки товарни возила чија вкупна маса преминува 7,5 тони, соопштија од АМСМ повикувајќи се на информација од Министерството за транспорт и врски.
Во однос на ограничувањето од минатите години има измена во временските интервали, со цел овозможување на движење на тешките товарни возила во малку поширока временска рамка.
Измената во временските интервали е следната:
Наместо временските периоди за време на викендите и тоа петок од 15.00 до 24.00 часот, сабота од 07.00 до 24.00 часот и недела од 07.00 до 24.00 часот, забраната би се однесувала на период за време на викендите и тоа петок од 15.00 до 22.00 часот, сабота од 07.00 до 12.00 часот и од 18.00 до 24.00 и недела од 07.00 до 22.00 часот.
Оваа забрана се однесува за период од 01.07. до 01.09. секоја тековна година.