Енергетскиот модел на СЕЕ СЕП проектот покажува дека за регионот на Југоисточна Европа поисплатливо е да се применат климатските политики на ЕУ за 2050 отколку да продолжи со градење термоелектрани.
Според енергетскиот модел за 7 земји од регионот на Југоисточна Европа (ЈИЕ) се покажа дека технички е изводливо во ЈИЕ да се постигнат ЕУ климатските цели за 2050 (намалување на емисиите за 80% до 2050). За да се постигнат овие ЕУ цели за 2050 треба да се затворат термоелектраните во ЈИЕ и истите да се заменат со обновливи извори на енергија.
Втор значаен резултат од моделот е дека за земјите од ЈИЕ поевтино е да ги применат климатските цели на ЕУ за 2050 отколку да продолжат да инвестираат во термоелектрани. Моделот исто така покажува дека со следење на климатските политики на ЕУ до 2050, земјите од регионот не само што ќе ги намалат своите емисии, туку ќе оневозможат дополнителни здравствени трошоци како последица од климатските промени.
Енергетскиот модел исто така покажува дека со регионална соработка визијата да се постигнат климатските цели на ЕУ и со тоа да се има одржлива енергетска реалност со нови работни места може да стане реалност.
Моделот развива нискокарбонски сценарија до 2050, е подготвен во рамките на проектот СЕЕ СЕП, во кој Аналитика учествува од самиот почеток, и се темели на јавни податоци и консултации со над 500 чинители. Енергетскиот модел првобитно е развиен од Одделот за енергија и климатски промени на Обединетото Кралство. Искуствата од таму укажуваат дека дискусијата за енергетските прашања е поквалитетна ако истата е отворена. За таа цел овој модел е од отворен карактер и секој чинител или граѓанин може да го погледне и да го користи.
Денес, на 17 јуни 2015, овој модел се презентира на конференција во Европската комисија во Брисел како дел од Енергетската недела на ЕУ.
Линк од настанот: http://www.eusew.eu/component/see_eventview/?view=see_eventdetail&mapType=hlpc&eventid=4585
Повеќе информации за проектот: http://analyticamk.org/en/programs/public-policy-analysis-and-administration/44-category-en-gb/programs/public-policy-analysis-and-administration/335-south-east-europe-sustainable-energy-policy-see-sep
