Најновото издание на францускиот сатиричен магазин „Шарли ебдо“ од денеска е во продажба, а на насловната страна се наоѓа цртеж од пророкот Мухамед кој плаче и држи во рацете порака „Јас сум Шарли“.
Три милиони примероци беа испечатени, една недела од исламистичкиот напад на редакцијата на магазинот во Париз, во која беа убиени осум новинари и уште четири луѓе, пренесува „BBC“.
Новиот број го направија преживеаните членови на редакцијата и е достапен во 25 земји и на 16 јазици.
Браќата Саид и Шариф Кунаши на 7-ми јануари убија 12 луѓе во нападот на редакцијата на „Шарли ебдо“, вклучувајќи ги петмината најдобри карикатуристи и три членови на редакцијата.
Весникот „Шарли ебдо“ во минатото многу пати објавуваше сатиристички карикатури од пророкот Мухамед, што во некои од муслиманските земји предизвика голем бес и одржување на протести.
Редакцијата на францускиот магазин поради закани од страна на радикалните муслимани од 2006-та година имаше полициска заштита.
Преживеаните членови од редакцијата се заколнаа дека ќе ја зачуваат традицијата, на чија сатира се мета сите религии, политичари, јавни личности и актуелни случувања.
