Македонската асоцијација на земјоделските задруги ги охрабрува државните институции поскоро да завршат со анализите во врска со сомнежот од руска страна за наводен реекспорт на европски овошје и зеленчук од Македонија.
Како што изјави претседателот на Асоцијацијата Менде Ивановски, доколку се утврди дека некој навистина продавал земјоделски производи со потекло од ЕУ, треба да биде најстрого казнет.
„Како обединувачко тело на повеќе производители на овошје и зеленчук вклучени во земјоделските задруги, ја поддржуваме акцијата на Министерството за економија кое врши контрола на фирмите кои извезуваат овошје и зеленчук на рускиот пазар од ЕУ декларирани како македонски. Истовремено повикуваме, доколку се утврдат злоупотреби, сторителите најстрого да бидат казнети“, рече Ивановски.
Доколку Русија воведе санкции и врз Македонија, додаде, производителите ќе бидат многу оштетени.
Според Ивановски, земјава има што да пласира и може да биде конкурентна на рускиот пазар, особено со јаболка и праски, но и со одредени видови зеленчук.
„Моментно имаме над 20 илјади тони квалитетно јаболко само од ресенскиот крај кое може да оди без проблем на рускиот пазар, а да не зборуваме и за другите краеви од Македонија. Исто така, праски веќе продаваме, годишно шест до седум илјади тони“, нагласи претседателот на Асоцијацијата.
