Белото тероар вино „Барово“ од бербата 2012-та освои златен медал на престижниот натпревар Mundus Vini, кој по 13-ти пат се одржува во Германија, а на кој најголемата македонска винарница дополнително освои и еден сребрен медал за виното „Темјаника Special Selection” од истата берба.
Годинава, меѓународното жири составено од 250 судии – дегустатори од 45 земји ги одбраа најдобрите од над 6000 вина од најпознатите вински региони во светот. Ова се трето злато и осмо сребро за висококвалитетните вина на „Тиквеш“ на ова престижно винско натпреварување, освоени во претходните години.
Со најновите медали, вкупната бројка високи одличија што ги добија врвните македонски вина на „Тиквеш“ на најпрестижните светски вински натпревари оваа година, достигна 44.
„Сите награди што ги добиваме на светски познатите натпревари се значајни затоа што тие се одлична препорака за врвниот квалитет на нашите вина пред купувачите. Но, наградите од Mundus Vini имаат дополнителна тежина, особено за динамизирање на извозот на македонското висококвалитетно флаширано вино на германскиот пазар. Очекуваме дека медалите што ги освојуваме ќе помогнат во креирање на посакуваната слика за нашите врвни вина што ќе биде одлична вест не само за „Тиквеш“, туку и за целата македонска винска индустрија“ – изјави Игор Илиевски, генерален директор на ВВ „Тиквеш“.
Меѓународниот натпревар за квалитет на вината – Mundus Vini е востановен во 2001-ва година. Натперварот се одржува под патронат и правила на Меѓународната организација за вино (OIV – Organisation Internationale de la Vigne et du Vin) и Mеѓународната унија на енолози (UIOE – Union Internationale des Enologues).
