Министерството за транспорт и врски денеска објави продажба преку електронско наддавање на државно градежно земјиште во Вевчани, наменето за изградба на бензинска пумпа. Во општина Аеродром, пак, државата продава земјиште за изградба на објект за мали комерцијални и деловни дејности и за станбена куќа.
Почетната цена за земјиштето во Вевчани е 130 денари за метар квадратен, а правното лице што ќе се пријави за учество на наддавањето меѓу другото треба да има најмалку 30 бензински пумпи. Рокот за поднесување пријави е до 10 следниот месец, а наддавањето ќе се одржи на 17 септември.
За парцелите во Горно Лисиче и Мичурин во Општина Аеродром почетната цена е 5.000 денари и 1.543 денари за метар квадратен. Пријавите може да се достават до 4 септември, а наддавањето ќе се одржи на 11 септември.
