По повеќе од 30 години „Nissan“ ја обнови марката „Datsun“. Првиот модел од новата серија ќе ја има ознаката „GO“, a ќе се произведува во Индија.
Предвидено е „GO“ да се појави во продажба на почетокот на 2014-та година, а почетната цена би требало да се движи околу 5000 евра.
„Datsun GO“ е пред се градски автомобил со пет врати, базиран на моделот „Nissan Micra“. Возилото е долго 3.785 mm, широко е 1.635 mm, a високо 1.485 mm, додека меѓуосовинското растојание е 2.450mm.
Дизајнот на ентериерот е „спартански“ и „сиромашен“, но е многу едноставен, функционален и прилагоден за пазарите во развој.
Единственоста на автомобилот се рефлектира и низ погонските единици. Па така станува збор за еден единствен мотор кој има трицилиндри и е 1.2 литарски бензинец со засега непозната снага. Тој е поврзан со петстепен мануелен менувач.
„Datsun GO“ е првиот од неколкуте идни модели на овој обновен јапонски бренд кој „Nissan“ има во план да го лансира на пазарите како што се индискиот, рускиот и јужноафричкиот.