Цената на недвижнините во најголемите кинески градови минатиот месец се зголеми за 7,4 проценти на годишно ниво, и покрај обидите на владата да го ограничи растот на цената на тој пазар.
Просечната цена на новите станови во 100-те најголеми кинески градови во јуни достигна 10.258 јуани (1.672 долари) за метар квадратен, пренесува агенцијата Франс прес.
Јуни е седмиот последователен месец во кој цените се зголемија, иако растот од 0,77 проценти е помал во однос на оној од мај, кој изнесуваше 0,81 проценти, бидејќи банките го намалија кредитирањето на секторот за недвижнини поради криза со ликвидноста.
Понудата на кинескиот меѓубанкарски пазар е намалена веќе три недели, а каматните стапки кои банките ги наплатуваат при меѓусебното позајмување достигнаа рекордно високо ниво.
Цената на недвижнините е осетливо прашање за Кина, а владата во Пекинг веќе три години се обидува да го контролира нејзиниот раст.