„Jaguar“ потврди дека продукциската верзија на електричниот модел „I-Pace“ ќе има светска премиера на женевскиот саем за автомобили во март 2018-та.
Кросоверот на струја, со кој „Jaguar“ сака да му конкурира на пазарот на „Teslа Model X“, беше претставен на крајот на 2016-та во концептна верзија. Се очекува сериската верзија на овој автомобил да не се разликува од споменатиот концетп, како во надворешноста, така и во ентериерот на возилото.
„Jaguar“ со новиот модел сака на купувачите, пред се, да им понуди автомобил кој естетски е прифатлив, а притоа да користи електрична енергија за погон. Како резултат на напорите на инженерите и дизајнерите на оваа компанија настана „I-Pace“, кој визуелно ја задржува спортската појава карактеристична за моделите на „Jaguar“.
Од компанијата велат дека проблемот со сместување на погонските батерии го решиле така што ги поставиле под возилото, со што е осолободен простор во кабината и багажникот, а исто така е задржана функционалноста на автомобилот.
При проектирањето, инженерите на „Jaguar“ дадоа предност на функционалноста на кабината. Чусвството за просторност и отвореност на ентериерот им нуди панорамскиот покрив, кој со протега од шофершајбната до задната стаклена површина.
Непознато е какви ќе бидат перформансите на електричниот погон во сериската верзија. Потсетуваме, за погон на концептот беа употребени два електромотори – по еден на секоја осовина со вкупна комбинирана моќ од 400 ks, додека максималниот вртежен момент изнесува 700 Nm.
Автомобилот има погон на сите 4 тркала, а електричниот мотор се напојува со енергија од батеријата со капацитет од 90 kWh. За забрзување од место до „стотка“ е потребно околу 4 секунди.
Кога станува збор за автономијата во возењето со полна батерија, се споменуваше бројката од 500 km.
Сите дилеми ќе бидат разрешени најдоцна до почетокот на март 2018-та, кога „Jaguar I-Pace“ и официјално ќе биде претставен пред новинарите и публиката на саемот во Женева.
