Македонскиот каратист, Дејан Недев, на генералното собрание на Светската карате федерација (ИТКФ) е избран за нов член во бордот на директори на највисокото тело на ИТКФ.
Ова е големо признание и успех како за Дејан така за Македонија и македонското карате, затоа што за првпат Македонија ќе има свој преставник на вака висока позиција во ИТКФ.
На генералното собрание ИТКФ доби и нов претседател откако досегашниот Ричард Јоргенсен од Канада реши да се повлече од функцијата. Нов претседател на ИТКФ е Бразилецот Жилберто Гартнер од Бразил.
За претседател на техничката комисија е избран Ричард Јоргенсен, а меѓу останатите пет членови на оваа стручна комисија е и Венцислав Недев. Исто така, на состанокот беше одлучено да Венцислав и Дејан Недев во иднина бидат официјални преставници и преговарачи на ИТКФ со Меѓународниот олимписки комитет.
Инаку од утре па се до недела во Монтекатини, Италија ќе се одржат натпреварите на Обединетиот светски шампионат во традиционално, модерно и контактно карате, а Македонија ќе ја преставуваат 10 натпреварувачи.
