Добротворната иницијатива „Заедничка цел“ на шпанскиот фудбалер Хуан Мата доби сила кога Чарли Дениелс и Алфи Мосон станаа првите англиски играчи што ветија дел од својата заработувачка за добротворни цели.
„Зборував со неколку англиски играчи кои покажаа интерес во кампањата и одлично е што Чарли и Алфи се првите двајца што потпишуваат. Двајцата играат во Премиер лигата и нивната посвета е голем чекор напред“, изјави Мата.
Дениелс е бек на Бурнемаут, а Мосон е дефанзивец на тимот на Свонси. Двајцата ветија барем 1 отсто од својата плата за фондацијата на Мата, која го развива фудбалот во целиот свет. Уште позначајно е што двајцата фудбалери не се меѓу најплатените играчи во Премиер лигата и двајцата работеа напорно на својата кариера од пониските англиски лиги.
23-годишниот Мосон пред три години беше позајмен играч во Велинг јунајтед, а 31-годишниот Дениелс помогна Бурнемаут да се искачи од третата англиска лига во Премиер лигата.
„Искусив речиси сè што можеш како фудбалер во Англија и затоа никогаш нема да заборавам од каде дојдов. Фудбалот е важен дел од мојот живот како за многу луѓе во Англија и затоа е важно да се даде нешто назад“, изјави Дениелс.
Сега „Заедничка цел“ има 12 потписници во целиот свет вклучувајќи ги фубалските ѕвезди Матс Хумелс и Џорџо Кјелини.