Во новиот број на реномираната индиска ревија за литература „Инчентин версис“ се објавени избрани песни на еминентниот македонски поет и академик Радован Павловски, заедно со негова опсежна биобиблиографија.
Павловски е претставен во списанието на издвоено место, заедно со истакнатиот американски поет Томас Лукс, добитник на неколку награди за поезија меѓу кои и „Роберт Крили“, „Кингсли Тафтс“, „Гугенхајм“ и други, на кого постхумно му беше доделено признанието „Восхитувачки поет“, и со познатата американска поетеса Лин Томсон, селектирана по избор на редакцијата (Editor’s Choice), која ја има добиено наградата за поезија на книжевниот фестивал во Таксон за 2017 година и наградата „Стивен Дан“ во 2016 година.
„Инчентин версис“ е водечка индиска електронска книжевна ревија која првенствено е фокусирана на современата светска поезија. Главен уредник е еден од најафирмираните помлади индиски поети, Сонет Мондал, а гостин-уредник на овој број беше американската поетеса и книжевна критичарка Елена Карина Бирн. Уредник-консултант од Македонија е поетот и книжевен критичар Јовица Тасевски-Етернијан.
Академик Радован Павловски е еден од најафирмираните македонски поети, чија поезија е преведена на околу педесет јазици. Автор е на дваесетина поетски книги, како и на книги со патеписи и есеи, а ги има добиено сите најзначајни македонски награди за поезија, како и неколку странски награди и признанија.
