Oваа недела консултантската интернет компанија „Cable.co.uk“ го претстави новиот извештај, кој ги анализира податоците за интернет брзината при симнување на информации во 189 земји. За период од една година до 10-ти мај 2017-та година биле извршени 63 милиони тестови на брзината во целиот свет, а од нив станува јасно – Без преседан лидер по овој показател е Сингапур.
Според податоците на интернет корисниците во Сингапур, тие можат да симнат филм со HD квалитет и големина од 7,5GB само за 18 минути и 30 секунди. Ова се случува благодарение на просечната интернет брзина во земјата од 55,13 Mbps.
На второ место на листата се наоѓа Шведска (40,16 Mbps), проследена од Тајван (34,4 Mbps). Останатите земји со брзина над 30 Mbps се Данска (33,54 Mbps), Холандија (33,52 Mbps) и Латвија (30,36 Mbps).
САД се наоѓаат значително позади во споредба со многу други развиени земји, заземајќи го едвај 21-то место на листата со просечна брзина од 20 Mbps и време за симнување на филмови од 51:13 минути.
Резултатите сепак се малку подобри од оние на соседна Канада – 18,03 Mbps и време за симнување од 56:48 минути.
Македонија во рангирањето меѓу 189 земји ја зазема 59-та позиција со просечна брзина од 7,34 Mbps и време за симнување на филмови од 2 часа 19:28 минути.
