Предностите од пешачењето или возењето точак веќе се добро познати за телесното здравје, а новите истражувања укажуваат и на користа за менталното здравје, бидејќи работниците кои на работа одат пешки или со точак постигнуваат подобра концентрација и имаат поголема стапка на задоволство.
Британскиот статистички завод објави извештај според кој Британците кои на работа одат пешки се позадоволни во својот живот, а исто така и оние кои патуваат со велосипед бидејќи во нив се создава помалку стрес и нервоза за разлика од оние кои патуваат со автомобил или со јавен превоз.
Дури и работниците кои на работа одат со јавен превоз се позадоволни и со подобри резултати, велат истражувачите, во споредба со оние кои патуваат со автомобил.
Пешачењето и велосипедизмот го активираат телото, умот, даваат енергија, ве разведруваат и на тој начин влијаат денот да ви започне подобро, освен тоа, се најповолни и за околината. Во високо развиените земји, бројот на лица кои на работа одат со велосипед од година во година е се поголем.
