Двајца Белгијанци успеале со „Model S“ да минат точно 901,2 km пред целосно да се испразнат погонските батерии на овој електрични автомобили.
Стивен Питерс и Џоери Колс објавиле на својот блог дека рекордот го поставиле возејќги го „Model S P100D“ на кружна траса на еден пат во Белгија, возењето траело 23 часа и 45 минути. Со цел да поминат повеќе километри, автомобилот е возен со брзина од околу 40 km/h.
Претходниот рекорд е поставен во 2015-та, а го држеше Кејси Спенсер, кој возејќи го „Model S 85D“ со батерија со помал капацитет минал 885,6 km, возејќи со брзина од околу 35 km/h.
Белгијанците при подготовките за соборување на рекордот внимателно ја избрале рутата по која ќе се движат, со цел да возат по пат на кој има помалку сообраќај и раскрсници. На крајот, избрале кружна патека, рамна делница долга околу 26 km.
На информацијата за новиот рекорд, реагираше и првиот човек на „Teslа“, Елон Маск, тврдејќи дека е можно „Model S P100D“ да мине и преку 1.000 km без дополнување на батеријата, но за таков резултат се неопходни посебни гуми.
