Европската комисија (ЕК) очекува Велика Британија да ги покрие трошоците околу „Brexit“ – за преместување на агенциите, кои во моментов се на Островот, и вонредните средби на високо ниво, службените патувања и преговорите, станува јасно од нацрт документ, цитиран од „Politico“.
Брисел го минимизира и валутниот ризик, очекувајќи Лондон да ја исполни оваа своја обврска, така што ќе плати во евра, станува јасно уште од текстот.
Во насоките за преговорите меѓу приоритетите е уште и заштита на граѓаните на ЕУ и бизнисот, кои се наоѓаат во Велика Британија. Генерално позицијата е дека излегувањето од заедницата нема да биде воопшто евтино.
„Нема казни, кога една земја ја напушта ЕУ. Нема цена која таа мора да ја плати, но треба да ја поправиме сметката“, смета главниот преговарач од името на ЕК, Мишел Барние.
Подготвените документи го покажуваат спротивното и според досегашни проценки Британија ќе должи околу 60 милијарди евра поради долгорочните обврски кон ЕУ по напуштањето на заедницата, пишува „Politico“.
За „Brexit“ ќе биде дискутирано од лидерите на 27-те земји од ЕУ (без Британија) на вонредна средба во Брисел, закажана за 29-ти април. Тогаш треба да биде подготвен и план на преговорите со Лондон.
Неколку дена порано, на 26-ти април, претседателот на ЕК, Жан-Клод Јункер ќе биде во Лондон на покана на британскиот премиер Тереза Меј, за да разговара за активирањето на членот 50 од Договорот за ЕУ. Тој ќе биде придружуван од Мишел Барние, објавија претходно од Брисел.
ЕК ќе ги претставува земјите од заедницата во разговорите со Лондон за „Brexit“. Нема да бидат дозволени билатерални преговори во таа насока. Договорот, кој ЕК ќе го постигне, треба да добие одобрение од Европскиот парламент.
Почетокот на преговорите најверојатно ќе биде одложен поради предвремените избори, кои ќе се одржат во Велика Британија на 8-ми јуни. Процесот на „Brexit“ треба да потрае две години, но овој рок може да биде продолжен со согласност на земјите од ЕУ.
