Велика Британија ќе изгуби многу повеќе отколку Европската унија (ЕУ) со одлуката да го напушти блокот, изјавила високата претставничка на ЕУ за надворешна политика и безбедност Федерика Могерини, додавајќи дека очекува тешки преговори со Лондон, пренесуваат светските агенции.
„Губиме важна членка на Унијата. За мене сите членки се важни и еднакви. Меѓутоа, сметам дека нашите британски пријатели ќе изгубат повеќе од нас“, рекла Могерини во Пекинг.
Според нејзе процесот на преговарањето не може да трае помалку од две години. „ЕУ, дури и по излегувањето на Британија, и понатаму ќе биде најголем светски пазар и втора по големина економија во светот“, рекла Могерини.
Британската премиерка Тереза Меј минатиот месец ја започна формалната процедура на излегувањето од ЕУ, а преговарачкиот процес со ЕУ се очекува да трае околу две години.