Македонската фудбалска репрезентација во Вадиц ја забележа првата победа во квалификацискиот циклус за пласман на Светското првенство во Русија. Во 5.коло, Македонија го победи Лихтенштајн со 3:0 (1:0).
Македонија победи во Лихтенштајн, ја прекина низата од четири порази во квалификациите и по цели шест години успеа да слави на гостински терен.
Избраниците на селекторот Ангеловски, го диктираа ритамот, напаѓаа во текот на сите 90 минути и таквата игра им донесе победа од 3:0.
Македонија настапи со исклучително офанзивна постава, со Пандев и Несторовски во врвот на нападот и Тричковски и Ибраими по бочните позиции.
Првиот гол на натпреварот го постигна Николов во 43.минута, кога со волеј од 15 метри го совлада Јеле.
Дилемите околу победникот, доколку воопшто и постоеја, ги реши Несторовски во интервал од пет минути. Напаѓачот на Палермо најпрвин со глава ја заврши акцијата на Пандев во 68.минта, а пет минути подоцна, по ударот на Ристовски и одбраната на Јеле од непосредна близина ја спроведе топката во голот.
Можеше Несторовски да постигне хет трик, но во 89.минута не реализира пенал, односно Јеле го одбрани неговиот удар.