Шефот на дизајнерскиот оддел на Land Rover – Џери Макгаверн – рече дека е решен по природен пат да ги елиминира надворешните дизајнерски студија и тјунинг компании. За да го стори тоа, тој и „Land Rover“ ќе пуштат на пазарот ексклузивни верзии на своите модели, за чие создавање ќе биде ангажиран внатрешниот оддел „Special Vehicle Operations“ (SVO).
Моделите на „Land Rover“, а најмногу оние брендирани како „Range Rover“, одамна се предмет на желба од страна на независни дизајнерски студија и тјунинг компании кои им нудат на клиентите нестандардни пакети за визуелни и технички подобрувања. Најновиот модел на „Range Rover“ наречен Velar, исто така се очекува да привлече сличен интерес.
Иако Макгаверн не прецизира кои компании особено предизвикале револт кај нив, сепак вели: „Лесно е да земеш завршен автомобил и да му додадеш мал спојлер или нешто слично за да го направиш попривлечен. Сакам да видам од нив како се дизајнира сопствен автомобил. Гледаме како ги земаат нашите проекти и заработуваат повеќе пари од нив“.
„Па, мислам да ги извадиме од играта преку нашиот департмент за специјални случувања „SVO“. Можностите кои ги создаваме таму, како и квалитетот на изработката, се многу добри“, додава Мегаверн.
„Range Rover Velar“, кој беше претставен на саемот во Женева, ќе излезе на пазарот во текот на летото со цена од 44.830 фунти.
