Организаторите на натпреварот „Светски автомобил на годината“ (World Car of the Year, WCOTY) ги објавија моделите кои ќе се борат за победа во секоја од категориите. Во основата – за најдобар автомобил, победникот сигурно ќе биде кросовер, откако до финалето стигнаа 3 такви машини – „Audi Q5“, „Jaguar F-Pace“ и „Volkswagen Tiguan“.
На овој начин од борбата за првото место отпаѓаат „Audi Q2“, „Fiat / Abarth 124 Spyder“, „Honda Civic“, „Mazda CX-9“, „Skoda Kodiaq“ и „Toyota C-HR“. Интересно е дека најдобар автомобил во Европа за оваа година исто така е кросовер – францускиот „Peugeot 3008“, кој ја доби наградата претходно во оваа недела.
Претенденти во категоријата „Спортски автомобил на годината“ се „Audi R8 Spyder“, „McLaren 570S“ и „Porsche 718 Boxster/Cayman“, а од битката отпаднаа „Aston Martin DB11“ и „Honda/Acura NSX“.
За „Најдобар премиум-автомобил“ се борат „BMW 5 Series“, „Mercedes-Benz E-Class“ и „Volvo S90/V90“, а „Bentley Bentayga“ и „Genesis G90“ го напуштија турнирот.
До финалето во категоријата „Градски автомобил на годината“ стигнаа „BMW i3“ (94 Ah), „Citroen C3“ и „Suzuki Ignis“, додека отпаднаа „Ford Ka +“ и „smart Cabriolet“.
За „Зелен автомобил на годината“ останаа да претендираат „Chevrolet Bolt“, „Tesla Model X“ и „Toyota Prius Prime“, откако „Honda Clarity Fuel-Cell Car“ и „Hyundai Ioniq“ го напуштаат натпреварот.
Првото место за „Дизајн на годината“ ќе си го оспоруваат „Jaguar F-Pace“, „Mercedes-Benz S-Class Cabriolet“ и „Toyota C-HR“. Во оваа категорија учествуваа сите автомобили кои беа номинирани за конкурсот.
Сите победници ќе бидат познати во текот на автосаемот во Њујорк во април по новото гласање на жирито, во кое влегуваат 70 автомобилски новинари од 25 земји.
