До 60 отсто се поевтини услугите на македонската Државна фитосанитарна лабораторија ДФЛ за дијагностицирање два карантински растителни вируси и за контрола на активните материи во производите за заштита на растенијата во однос на оние што ги нудат лабораториите во земјите-членки на ЕУ.
Анализите се вршат согласно сите стандарди, техничко-технолошки услови и барања на Унијата. Методите од минатиот месец се и сертифицирани со што Македонија прва во регионот е акредитирана за ваков вид испитувања.
– Со ваква контрола се намалуваат трошоците на земјоделците кои досега контролите требаше да ги прават во други држави, но се заштедува и државата. Воедно, сертифицираните методи овозможуваат подобра заштита на населението и зголемена безбедност на храната што, пак, придонесува и за здравјето на животните, растенијата и животната средина, рече денеска на прес-конференција во Стопанската комора директорката на ДФЛ Билјана Коруновска.
Таа најави уште поинтензивни активности за осовременување на лабораторијата.
– Значењето на добиените резултати од ДФЛ е огромно за што директно влијае врз квалитетот на домашното земјоделско производство, на зголемениот извоз на меѓународните пазари и на пласирањето безбедна храна од растително потекло во земјава, истакна Коруновска.
Државната фитосанитарна лабораторија е основана во 2005 година, а функционира во рамки на Министерството за земјоделство, шумарство и водостопанство. Се занимава со анализи на производи за заштита на растенија, семе и саден материјал, штетници и болести, како и физичко-хемиски својства на активни супстанци кај заштитните препарати.
