Владата на Бразил предложи фиксирање на минималната старосна граница за пензионирање на 65 години, како дел од реформите на пензискиот систем за кој многумина велат дека е неодржлив.
Бразилците сега имаат можност да се пензионираат само врз основа на бројот на годините на работниот стаж и тоа можат да го направат штом навршат 50 години.
Претседателот Мишел Темер пред Конгресот и синдикалните лидери го претстави пензискиот план, а пратениците ќе го разгледуваат денес.
Бразил е во длабока рецесија, а Владата се надева дека реформите на пензискиот систем ќе го ублажат притисокот врз јавните финансии и ќе го поттикнат економскиот раст. Најавувајќи го планот, Темер изјави дека „реформите на системот за социјално осигурување денес, се единствена гаранција дека системот за социјално осигурување ќе постои и утре.“
