Молкот и натаму е единствениот одговор од властите околу сите отворени прашања поврзани со обидот за преземање на нафтениот гигант Макпетрол од страна на анонимната офшор-компанија „Балкан Петролеум Холдинг Лимитед“.
Комисијата за хартии од вредност официјално ја запре постапката, со што практично ја продолжи неизвесноста кај вработените и акционерите на компанијата, кои стравуваат за својата иднина. КХВ и натаму ги крие причините поради кои ја запре постапката и фамозниот „друг државен орган“ од кого се чека одговор. Комисијата и во претходните три месеци не откриваше ниту една информација за понудата на „БХПЛ“, и покрај информациите за сомнителното минато на луѓето поврзани со офшор-компанијата и потеклото на нивните пари.
Оттаму, во јавноста од самиот почеток на целиот случај се поставува прашањето: дали македонските институции дозволуваат во стопанството на мала врата да се „протне“ сомнителен странски капитал? Одговорот на ова клучно прашање и натаму е непознат, но јасно е дека последиците од ваков исход би биле катастрофални за домашната економија, а на своја кожа би ги почувствувале сите граѓани.
Сомневањата за опасни заткулисни игри околу Макпетрол ги засилува и молкот во сите други надлежни институции. Централниот депозитар за хартии од вредност, кој има законски надлежности во постапката за преземање на една компанија, исто така не открива информации кои акционерите имаат право да ги знаат: дали „БХПЛ“ достави валидна банкарска гаранција? Дали е извршена проверка на банкарската гаранција? Дали таа е сè уште активна, со оглед на тоа дека поминаа четири месеци? Правдајќи се со наводна тајност на постапката, Централниот депозитар и натаму им ги ускратува овие информации на сите засегнати страни во случајот.
Наспроти наводите за сериозен криминал во минатото на луѓето поврзани со „БПХЛ“ и нивно учество во коруптивни зделки, ниту една македонска институција досега не се одважи да ги истражи сомнителните руско-украински инвеститори и потеклото на парите со кои тие сакаат да ја преземат најголемата македонска нафтена компанија. Иако според законите има и надлежности и обврски да го стори тоа, Управата за финансиско разузнавање досега не презеде апсолутно ништо во правец на истражување на основаните сомневања во искреноста на намерите на луѓето од „БХПЛ“. Наместо да го заштити македонското стопанство, што е нејзина главна обврска, Управата покажува незаинтересиран однос кон ова важно прашање, што дополнително ги продлабочува сомнежите дека државата е соучесник во обидот за инсталирање на дубиозниот офшор капитал во стопанството.
Всушност, фрапантно е тоа што единствената институција која реагираше во врска со случајот „Макпетрол“ не е од Македонија, туку од странство. Европската енергетска заедница уште пред неколку месеци испрати писмо до македонските надлежни институции, во кои бара одговори на отворените прашања околу случајот. ЕЕЗ, меѓу другото, изрази загриженост околу стабилноста на снабдувањето на земјата со гас, поради тоа што Макпетрол, заедно со државата е сопственик на компанијата Га-Ма, која го управува системот за пренос на гас во земјата. Македонските институции одлучија да го игнорираат писмото и загриженоста на ЕЕЗ, што отвори можност за нова конфронтација меѓу Владата и европското регулаторно тело и опасност од санкции кон Македонија.
Акционерите и вработените во Макпетрол, а и сите други заинтересирани страни и натаму чекаат институциите конечно да се изјаснат околу овој случај. Макпетрол и натаму е тема за која јавноста со право се интересира –значењето на нафтениот гигант за македонската економија е огромно, а ништо помали нема да бидат ниту последиците, доколку властите дозволат влез на сомнителни, криминални структури во домашното стопанство.
