Претставници на Министерството за финансии од понеделникот неофицијално ги започнаa средбите со потенцијалните вложувачи од Европа и САД, во врска со купувањето на последната емитувана еврообврзница во најголем износ досега од 650 милиони евра, со рок на доспевање од десет години.
Каматата која ќе се плаќа многу ќе зависи од интересот на странските вложувачи кои ќе ги пресметуваат и потенцијалните ризици кога ќе ја перципираат македонската економија, преку растот, дефицитот, но и сé уште актуелната политичка криза. Аналитичарите сметаат дека е најважно дали ќе се успее во целост да се соберат планираните средства, бидејќи тоа ќе влијае на кредитниот рејтинг на земјава.
За бизнисмените, пак, еврообврзницата ќе ја исполни својата улога само ако парите завршат во стопанството. Според нив, на компаниите итно им е потребна финансиска инјекција за да го испорачаат посакуваниот раст.
Од Стопанската комора на северозападна Македонија се скептици дека овие пари ќе завршат во стопанството. Велат дека претходните задолжувања биле искористени за обезбедување на социјален мир, а не за развојни проекти.
Домашните експерти велат дека оваа еврообврзница ја турка земјата во ризици, бидејќи поради високото ниво на задолженост, вложувачите би биле претпазливи, а македонската економија ќе мора постојано за да ги отплаќа обврските
Емисијата на оваа еврообврзница предизвика негодување и кај проопозицските граѓански здруженија, кои започнаа и со собирање петиција и протест во понеделникот пред Министерството за финансии против новото задолжување на државата, барајќи да Владата да објасни за што ќе бидат трошени вака добиените парти.
