Осум земји-членки на Европската унија(ЕУ) кои не го користат еврото, можеби ќе мораат итно да ја воведат заедничката европска валута, по одлуката на Велика Британија да ја напушти Унијата, пишува британски Daily Express.
Наводно Жан Клод Јункер би можел ултимативно да побара од Хрватска, Данска, Бугарија, Шведска, Чешка, Унгарија, Полска и Романија да го воведат еврото како платежно средство. Тој по Brexit сака што побрзо да ги поврзе останатите членки на ЕУ со заедничка валута, за да може ЕУ да стане монетарна унија во целост.
И германскиот Frankfurter Allgemeine Zeitung исто наведува дека по Brexit ќе се забрзаат плановите за довршување на монетарната унија.
И покрај прозивките, Јункер продолжува со притисокот што е во согласност со планот за итно воведување на еврото во земјите кои уште не го користат, пишува Daily Express.
Откако Британците се изјаснија за излегување од ЕУ, досегашниот еврокомесар за финансии, Британецот Лорд Хил поднесе оставка, а на негово место дојде Латвиецот Валдис Домбровскис, кој уште претходно се залагаше за воведување на еврото во сите земји членки.
