29 март, 2024
ПочетнаЕКОНОМИЈАПоголеми субвенции за привлекувањето странски туристи и нискобуџетните летови

Поголеми субвенции за привлекувањето странски туристи и нискобуџетните летови

saracini_0702_g_0

Тур-операторите и туристичките агенции годинава ќе добијат уште поголема поддршка за привлекување странски гости. Обезбедени се вкупно 60 милиони денари, освен за престој на туристи од БЕНЕЛУКС, и за посетители од уште девет нови држави, Финска, Норвешка, Данска, Шведска, Русија, Украина, Обединети Арапски Емирати и Јапонија.

Како што соопшти денеска министерот за економија Ваљон Сарачини, од 2014 година субвенциите ќе важат и за туристите од Кина и Индија, а од 2015 и за Казахстан, Азербејџан, Катар, Германија, САД и Англија.

Владата се одлучи на ваков чекор, нагласи Сарачини, поради ефектите што ги даде ланската поддршка.

– Вкупно 663.633 туристи, од кои преку половина странски, односно околу 20.000 повеќе од 2011 и 80.000 повеќе од 2010 година, се ефектите од субвенционирањето на организираниот странски промет и поддршката за нискобуџетните летови. Евидентен пораст се забележува особено кај странските туристи безмалку за 100.000 во однос на 2010 и за 30.000 во споредба со 2011 година, истакна министерот.

Минатата година се остварени 122,3 милиони долари девизен прилив благодарение на туризмот, а во 2011 е забележан суфицит од 127 милиони долари.

Сарачини информира дека зголемување ќе има и на субвенциите за поттикнување и развој на воздушниот сообраќај за домашните и странските превозници. За оваа намена годинава се проектирани 86 милиони денари, а за 2014 – 135 милиони.

– Придобивките од овој вид субвенции се веќе познати, преку Визер лани се отворени шест нови линии, а годинава и дополнителни две, посочи министерот за економија.

Условите за добивање владина поддршка за тур-операторите и туристичките агенции, остануваат исти.

Директорот на Агенцијата за поддршка и промоција на туризмот Јордан Трајков потсети дека престојот на гостите во Македонија мора да биде со најмалку три ноќевања и појадок во некои од угостителските објекти.

– Организаторите за да добијат субвенции до Агенцијата мора да достават копии од договорите со превозниците (автобуски, авионски или железнички), копии од сметките и податоци за бројот на гостите. Потребно е да се достават и документи за договорот за закуп за сместување на туристите, рече Трајков.

Роковите за аплицирање за сите видови барања од 1 јануари до 30 септември тековната година се 60 дена од заминувањето на групата и 30 дена од заминувањето на групата за сите видови барања од 1 октомври до 31 декември тековната година.

НАЈНОВИ ВЕСТИ

ХОРОСКОП