Пет менаџери во категориите мали и микро претпријатија се добитници на признанието „Претприемач на годината 2015“, беше објавено во петокот на манифестацијата што деветта година по ред ја организираат Сојузот на стопански комори, (ССК), Македонската развојна фондација за претпријатија, Стопанската комора на северозападна Македонија и Националниот центар за развој на иновации и претприемачко учење.
Во категоријата мали претпријатија, првата награда им припадна на Томо Ѓоргиески и Петар Василески од компанијата „Ламинати Ком“ од Прилеп, додека втората на Дејан Трајчев од „Дени Милк“ од Кочани. Кај микро-претпријатија првата награда ја освои Ељмедин Адеми од „Скрин Медиа“, а втората Владимир Јосифовски од „Кала Плакат“.
Доделена, исто така, беше и специјалната награда од Министерството за економија, и тоа за наградата за најдобра жена претприемач којашто ѝ припадна на Анета Мустафоска од компанијата „Исиглас“.
„Малите и средните претпријатија се многу важни за генерирање економски раст и нови работни места. Владините мерки за континуирано подобрување на бизнис климата и реформите претставуваат реална поддршка за компаниите и македонската економија во целост за што зборуваат и резултатите од меѓународните рангирања“, рече министерот за економија Беким Незири пред доделувањето на наградите.
Министерот Незири притоа порача дека признанијата за најуспешните треба да претставуваат мотив и пример за сите претприемачи.
Како што истакна, пак, претседателката на ССК. Данела Арсовска, претприемништвото е начин на живот, избор, храброст, смелост секој сам да направи исчекор, нечекајќи помош од некој друг.
„Остануваме на определбата постојано да ги следиме иновациите и да обезбедуваме поддршка особено за малите претпријатија од кои многу успеаја да прераснат во средни, па дури и во големи“, рече Арсовска.